भरतपुर, १४ जेठ।
चितवनको भरतपुर अस्पतालमा आफ्ना ४ वर्षीय छोराको शव कुर्दै राक्सिराङका रामकुमार प्रजा मर्माहत अवस्थामा भेटिएका छन्। विद्यालयको लापरबाहीका कारण एकमात्र छोरा गुमाउनुपर्दा उनी र उनको परिवार गहिरो शोकमा छ। वैदेशिक रोजगारीमा रहेकी बालककी आमा छोराको अन्तिम मुख हेर्न नेपाल फर्कँदै छिन्।
मकवानपुरको राक्सिराङ गाउँपालिका वडा नं. ६ स्थित सिलिङ्गे राष्ट्रिय माध्यमिक विद्यालयमा अध्ययनरत ४ वर्षीय एरोन प्रजा विद्यालय परिसरमै रहेको जुत्ता राख्ने फलामको र्याकले चेपिएर गम्भीर घाइते भएका थिए। उनलाई उपचारका लागि भरतपुर अस्पताल ल्याइएकोमा उपचारकै क्रममा मृत्यु भएको हो।
बालकका बुवा रामकुमारले न्यायका लागि कानुनी लडाइँ लड्ने र अदालत जाने तयारी गरे पनि पीडित परिवारलाई ३ लाख रुपैयाँ दिएर घटनालाई कानुनी दायरामा लैजानबाट रोकिएको र मुद्दा फत्ते गरिएको चर्चा बाहिर आएको छ।
यस दुःखद घटनालाई लिएर स्थानीय र नागरिक समाजले आक्रोश व्यक्त गरेका छन्। पीडित परिवारलाई न्यायोचित क्षतिपूर्ति दिनुपर्ने, घटनाको निष्पक्ष छानबिन हुनुपर्ने र आगामी दिनमा विद्यालयहरूमा बालबालिकाको सुरक्षा सुनिश्चित गर्न विद्यालय प्रशासन जिम्मेवार बन्नुपर्ने माग उठेको छ।
