१६ जेठ २०८३
काठमाडौं — नेपाल राष्ट्रिय मण्डली संगति (NCFN) को आसन्न निर्वाचनमा नयाँ मोड आएको छ। संगठनको आगामी कार्यसमितिका लागि अध्यक्ष पदमा उम्मेदवारी दिनुभएका पास्टर निश्चल तामाङले आफ्नो उम्मेदवारी फिर्ता लिनुभएको छ।
मण्डलीभित्रको आन्तरिक एकता, शान्ति र ज्येष्ठ अगुवाहरूको सम्मानलाई सर्वोपरि ठान्दै उहाँले निर्वाचनको मैदानबाट बाहिरिने निर्णय गर्नुभएको हो।
एकता र सहकार्यका लागि त्याग
उम्मेदवारी फिर्ता लिने आफ्नो निर्णयबारे प्रष्ट पार्दै पास्टर तामाङले यो कदम कुनै व्यक्तिगत स्वार्थ वा दबाबमा नभई मण्डलीभित्रको सुदृढ एकता र आपसी सहकार्यलाई प्राथमिकता दिनका लागि चालिएको बताउनुभयो। ललितपुरस्थित ‘उद्दार मण्डली’का वरिष्ठ पास्टर समेत रहनुभएका तामाङले भन्नुभयो:
”मण्डली परिवार सधैँ एकता, शान्ति र सहकार्यको मार्गमा अघि बढ्नुपर्छ। ज्येष्ठ अगुवाहरूको अनुभव र सम्मानलाई कायम राख्दै संगठनलाई थप बलियो बनाउन मैले यो निर्णय लिएको हुँ।”
शुभेच्छुकहरूप्रति धन्यवाद र क्षमायाचना
निर्वाचन प्रक्रियामा अन्तिमसम्म अघि बढ्न नसकेकोमा पास्टर तामाङले आफ्ना समर्थकहरूसँग क्षमायाचना समेत गर्नुभएको छ। उम्मेदवारी घोषणा गरेदेखि नै आफूलाई अगाध प्रेम, बलियो समर्थन र निरन्तर प्रार्थनाद्वारा साथ दिने सम्पूर्ण पास्टरहरू, अगुवाहरू, मित्रहरू, परिवारजन तथा शुभेच्छुकहरूप्रति उहाँले हार्दिक कृतज्ञता र धन्यवाद व्यक्त गर्नुभएको छ।
साथै, उहाँले सिंगो मण्डली परिवारलाई आगामी नेतृत्व चयन र NCFN को भावी गतिविधिका लागि निरन्तर प्रार्थनामा रहन विशेष अनुरोध गर्नुभएको छ।
संगठनभित्र सकारात्मक सन्देश
NCFN को निर्वाचन प्रक्रिया जारी रहँदा आएको पास्टर तामाङको यो निर्णयलाई संगठनभित्र र बाहिर निकै सकारात्मक रूपमा हेरिएको छ। पद र प्रतिष्ठाभन्दा माथि उठेर संगठनको मेलमिलाप र वृहत्तर हितलाई ध्यानमा राख्दै चालिएको यो कदमले मण्डली जगतमा एउटा उदाहरणीय र परिपक्व सन्देश प्रवाह गरेको विश्लेषण गरिएको छ।
