२५ बैशाख २०८३
हेटौंडा।
मकवानपुर जिल्लाका भूमिहीन, सुकुम्बासी तथा अव्यवस्थित बसोबासी नागरिकहरूको हक र अधिकार सुनिश्चित गर्ने उद्देश्यका साथ मन्दिरा मोक्तानको अध्यक्षतामा ‘भूमिहीन सुकुम्बासी अव्यवस्थित बसोबासी संघर्ष समिति’ गठन गरिएको छ। श्रम संस्कृति पार्टीकी केन्द्रीय सदस्य समेत रहनुभएकी मोक्तान मकवानपुर जिल्ला पार्टीबाटै सो पदमा चयनहुनुभएको एक सक्रिय युवा नेतृत्व हुनुहुन्छ। उहाँको नेतृत्वमा गठित यस समितिले जिल्लाका भूमिहीनहरूको समस्या समाधान गर्न, उनीहरूलाई लालपुर्जा वितरण गराउन र आधारभूत सेवा सुविधासहितको सम्मानजनक जीवन सुनिश्चित गर्न सम्बन्धित सरकारी निकायहरूसँग आवश्यक समन्वय र सहकार्य गर्ने लक्ष्य लिएको छ।
समितिको घोषणा कार्यक्रममा बोल्दै नवनियुक्त अध्यक्ष मोक्तानले आवासलाई नागरिकको आधारभूत अधिकारका रूपमा व्याख्या गर्दै वर्षौंदेखि राज्यको मूलधारबाट ओझेलमा परेका सुकुम्बासीहरूलाई संगठित गरी अधिकार प्राप्तिको आन्दोलनलाई अघि बढाउने प्रतिबद्धता व्यक्त गर्नुभयो। उहाँले कुनै पनि नागरिक भूमिहीन वा असुरक्षित अवस्थामा बाँच्नुपर्ने बाध्यताको अन्त्य हुनुपर्नेमा जोड दिनुभयो। कार्यक्रममा उपस्थित स्थानीय अगुवा तथा युवा प्रतिनिधिहरूले केन्द्रीय राजनीतिमा समेत सक्रिय मोक्तानको नेतृत्वमा वास्तविक पीडितहरूको आवाजले उचित निकास पाउने विश्वास व्यक्त गरेका छन्।
आगामी दिनमा यस समितिले जिल्लाका सबै पालिका र वडा स्तरसम्म संगठन विस्तार गर्दै जनचेतना फैलाउने, वास्तविक भूमिहीनहरूको तथ्याङ्क संकलन गर्ने र उनीहरूलाई आवश्यक कानुनी परामर्श उपलब्ध गराउने योजना बनाएको छ। “भूमिहीनको अधिकार, सम्मानित जीवनको आधार” भन्ने मूल नाराका साथ अघि बढेको यस समितिले आफ्ना भावी अधिकारमुखी कार्यक्रमहरू सफल बनाउन सबै सरोकारवाला पक्षहरूसँग सहयोग र ऐक्यबद्धताका लागि हार्दिक अपिल समेत गरेको छ।
