मनहरीमा युनिभर्सल फेस्ट २०८० को आज समापन हुँदै

फागुन ११ गते, मनहरी।
पश्चिम मकवानपुरको मनहरी गाउँपालिका ७ मा रहेको युनिभर्सल लर्निङ एकेडेमीमा युनिभर्सल फेस्ट २०८० सुरु भएको छ ।
गतबर्षबाट मात्रै कक्षा १० सम्मको अध्यापन सुरु गराएको एकेडेमीले बार्षिक कार्यक्रमलाई बृहत बनाएर उत्सवको रुपमा युनिभर्सल फेस्ट सञ्चालन गरेको हो । फेस्ट फागुन ९ गते सुरु भएर आज ११ गते भब्य समारोहका बीच समापन गर्ने कार्यक्रम रहेको विद्यालय सञ्चालक समितिका अध्यक्ष शिवकुमार रिजालले जानकारी दिनुभयो ।
युनिभर्सल फेस्ट अन्तर्गत पहिलो दिन विद्यालयका तीन कक्षासम्मका बालबालिकाहरुलाई खेलकुदमा सहभागी गराइएको छ । त्यसैगरी ठूला कक्षाका विद्यार्थीहरुका लागि फुटसल प्रतियोगिता सञ्चालन गरिएको उहाँले जानकारी दिनुभयो ।
फागुन १० गते ठूला कक्षाका बालबालिकाहरुबीच खेलकुद प्रतिस्पर्धा हुनेछ । जस अनुसार भलिबल, फुटसलसहित विविध खेलहरुका साथमा लोपोन्मुख चुङ्गी, स्टोन पिरामिड मेकिङ (हु गेम) लगायतका खेलहरु समेत समाबेश गरिएको छ ।
फागुन ११ गते भलिबल, फुटसल, म्याराथन दौडसहित सबै खेलहरुको फाइनल खेल हुनेछ । सोही दिन विद्यार्थीहरुले बनाएका विज्ञान सामग्री, सामाजिक शिक्षा अन्तर्गतका सामग्री र गणितका सामग्रीहरुको प्रदर्शनी हुनेछ ।
त्यसैगरी बालबालिकाकै नेतृत्वमा फुड स्टल सञ्चालनमा ल्याइनेछ । बालबालिकाले आफैले बनाएका खाजाका परिकारहरु स्टलमा राखेर बिक्री बितरण गर्ने र त्यसबाट भएको आम्दानी आफ्ना कक्षाको शैक्षिक विकासका लागि खर्च गरिने योजना बनाएर कार्यक्रम बनाइएको अध्यक्ष रिजालले जानकारी दिनुभयो । खेलकुद, शैक्षिक प्रदर्शनी, फुड फेस्टिबल र सांस्कृतिक कार्यक्रमलाई एकैसाथ मिसाएर युनिभर्सल फेस्ट सुरु गरिएको उहाँको भनाई छ ।
यसबर्षदेखि सुरु भएको फेस्टले आगामी बर्ष समेत परिमार्जित भएर निरन्तरता पाउने उहाँले जानकारी दिनुभयो । २०६३ सालमा स्थापना भएको एकेडेमीले पछिल्लो समय मनहरीसहित पश्चिम मकवानपुरमा शैक्षिक तथा सामाजिक सेवा क्षेत्रमा टेवा पु¥याउँदै आएको छ । अतिरिक्त कक्षाहरु सञ्चालन गरी विद्यार्थीहरुलाई कोर्षका अलावा बाह्य व्यवहारिक ज्ञानमा तीक्ष्ण बनाउने लक्ष्यसहित एकेडेमी सक्रिय बताइएको छ ।